متشغلش بالك وعدى اليوم !

 متشغلش بالك وعدى اليوم

اصحى وفرفش فوق من النوم 

 متأخر نط بسرعة ف الهدوم
      
   و متشغلش بالك وعدى اليوم

ركبت الأتوبيس وعيل ليك مرضاش يقوم

يبصلك ويضحك قوله شكرا ع العموم


ومتشغلش بالك وعدى اليوم 

دخلت لقيت الشغل مستنيك كوم ع كوم 

بصله كأنه بحر افرد وشك وادخل عوم


متشغلش بالك وعدى اليوم 

ترقيتك متأخرة وشايف نفسك مظلوم 

والعيال وامهم مشيلينك كتير هموم 



متشغلش بالك وعدى اليوم 

بترجع بيتك وانت حاسس انك مفروم

والمدام مستنية بالمدورة وريحتها توم


متشغلش بالك وعدى اليوم

فيه غيرك من كل ده محروم 

احمد ربك وارضى بالمقسوم


فمتشغلش بالك وعدى اليوم

واوعى ع النصيب ترمى اللوم

ديه نعمة كبيرة وياريتها تدوم 

 ده من غير كل ده يومك مالهوش لزوم

 فمتشغلش بالك وعدى اليوم

<script type="text/javascript"><!--